Subscribe to our newsletter and get our newest updates

Nabeel Ahmad Nabeel

  • Ghazal


kiran kiran ye kisi dida-e-hasad mein hai


kiran kiran ye kisī dīda-e-hasad meñ hai
har ik charāġh hamārā dhueñ kī zad meñ hai

jise nikālā hai hindsoñ se zā.icha-gar ne
baqā hamārī usī pāñch ke adad meñ hai

har ek shaḳhs kī qāmat ko naap aur batā
mire alāva yahāñ kaun apne qad meñ hai

gharoñ ke sahn kuchh aise sikuḌ simaT ga.e haiñ
har ek shaḳhs makīñ jis tarah lahad meñ hai

lage haiñ shāḳhoñ pe jis din se phūl-pāt na.e
har ek peḌ havelī kā chashm-e-bad meñ hai

'nabīl' aise adhūre haiñ roz-o-shab jaise
mirā azal kisī andesha-e-abad meñ hai

kiran kiran ye kisi dida-e-hasad mein hai
har ek charagh hamara dhuen ki zad mein hai

jise nikala hai hindson se zaicha-gar ne
baqa hamari usi panch ke adad mein hai

har ek shaKHs ki qamat ko nap aur bata
mere alawa yahan kaun apne qad mein hai

gharon ke sahn kuchh aise sikuD simaT gae hain
har ek shaKHs makin jis tarah lahad mein hai

lage hain shaKHon pe jis din se phul-pat nae
har ek peD haweli ka chashm-e-bad mein hai

'nabil' aise adhure hain roz-o-shab jaise
mera azal kisi andesha-e-abad mein hai


Leave a comment

+