terā chup rahnā mire zehn meñ kyā baiTh gayā
itnī āvāzeñ tujhe diiñ ki galā baiTh gayā

yuuñ nahīñ hai ki faqat maiñ hī use chāhtā huuñ
jo bhī us peḌ kī chhāñv meñ gayā baiTh gayā

itnā mīThā thā vo ġhusse bharā lahja mat pūchh
us ne jis ko bhī jaane kā kahā baiTh gayā

apnā laḌnā bhī mohabbat hai tumheñ ilm nahīñ
chīḳhtī tum rahī aur merā galā baiTh gayā

us kī marzī vo jise paas biThā le apne
is pe kyā laḌnā fulāñ merī jagah baiTh gayā

baat dariyāoñ kī sūraj kī na terī hai yahāñ
do qadam jo bhī mire saath chalā baiTh gayā

bazm-e-jānāñ meñ nashisteñ nahīñ hotīñ maḳhsūs
jo bhī ik baar jahāñ baiTh gayā baiTh gayā

tera chup rahna mere zehn mein kya baiTh gaya
itni aawazen tujhe din ki gala baiTh gaya

yun nahin hai ki faqat main hi use chahta hun
jo bhi us peD ki chhanw mein gaya baiTh gaya

itna miTha tha wo ghusse bhara lahja mat puchh
us ne jis ko bhi jaane ka kaha baiTh gaya

apna laDna bhi mohabbat hai tumhein ilm nahin
chiKHti tum rahi aur mera gala baiTh gaya

us ki marzi wo jise pas biTha le apne
is pe kya laDna fulan meri jagah baiTh gaya

baat dariyaon ki suraj ki na teri hai yahan
do qadam jo bhi mere sath chala baiTh gaya

bazm-e-jaanan mein nashisten nahin hotin maKHsus
jo bhi ek bar jahan baiTh gaya baiTh gaya

RECITATIONS Javed Naseem



00:00/00:00 Tera chup rehna mere zahen mein kya beith gaya - Tehzeeb Hafi Javed Naseem