Subscribe to our newsletter and get our newest updates

Zafar Moradabadi

  • Ghazal


be-qanaat qafile hirs-o-hawa oDhe hue


be-qanā.at qāfile hirs-o-havā oḌhe hue
manzileñ bhī kyuuñ na hoñ phir fāsla oḌhe hue

is qadar ḳhilqat magar hai maut ko fursat bahut
har bashar hai aaj ḳhud apnī qazā oḌhe hue

un ke bātin meñ milā shaitān hī masnad-nashīñ
jo ba-zāhir the bahut nām-e-ḳhudā oḌhe hue

kyā kare koī kisī se pursish-e-ahvāl bhī
aaj sab haiñ apnī apnī karbalā oḌhe hue

kyā ḳhabar kis moḌ par bikhre matā-e-ehtiyāt
pattharoñ ke shahr meñ huuñ ā.īna oḌhe hue

sab dilāse us ke jhūTe us ke sab vaade fareb
kab tak āḳhir ham raheñ sabr-o-razā oḌhe hue

kyuuñ tazabzub meñ na hoñ is daur ke ahl-e-nazar
gumrahī hai āgahī kā falsafa oḌhe hue

uñgliyāñ majrūh ho jā.eñgī rahnā duur duur
ḳhaar bhī haiñ in dinoñ gul kī ridā oḌhe hue

Dhaal us kī ban ga.ī hai sab balāoñ ke ḳhilāf
ghar se jo niklā buzurgoñ kī duā oḌhe hue

baḳhshishoñ se jis kī ḳhaas o aam sab the faiz-yāb
ham bhī the us bazm meñ lekin anā oḌhe hue

fasl-e-gul aa.ī to vīrāne bhī mahke har taraf
aaj ḳhud ḳhushbū ko thī bād-e-sabā oḌhe hue

ik zamīñ hī tañg kyā thī us se jab bichhḌe 'zafar'
āsmāñ bhī thā ġhazab-parvar ghaTā oḌhe hue

be-qanaat qafile hirs-o-hawa oDhe hue
manzilen bhi kyun na hon phir fasla oDhe hue

is qadar KHilqat magar hai maut ko fursat bahut
har bashar hai aaj KHud apni qaza oDhe hue

un ke baatin mein mila shaitan hi masnad-nashin
jo ba-zahir the bahut nam-e-KHuda oDhe hue

kya kare koi kisi se pursish-e-ahwal bhi
aaj sab hain apni apni karbala oDhe hue

kya KHabar kis moD par bikhre mata-e-ehtiyat
pattharon ke shahr mein hun aaina oDhe hue

sab dilase us ke jhuTe us ke sab wade fareb
kab tak aaKHir hum rahen sabr-o-raza oDhe hue

kyun tazabzub mein na hon is daur ke ahl-e-nazar
gumrahi hai aagahi ka falsafa oDhe hue

ungliyan majruh ho jaengi rahna dur dur
KHar bhi hain in dinon gul ki rida oDhe hue

Dhaal us ki ban gai hai sab balaon ke KHilaf
ghar se jo nikla buzurgon ki dua oDhe hue

baKHshishon se jis ki KHas o aam sab the faiz-yab
hum bhi the us bazm mein lekin ana oDhe hue

fasl-e-gul aai to virane bhi mahke har taraf
aaj KHud KHushbu ko thi baad-e-saba oDhe hue

ek zamin hi tang kya thi us se jab bichhDe 'zafar'
aasman bhi tha ghazab-parwar ghaTa oDhe hue


Leave a comment

+