haal kuchh ab ke judā hai tire dīvānoñ kā
shahr meñ Dher na lag jaa.e garebānoñ kā

ye mirā zabt hai yā terī adā kī tahzīb
rañg āñkhoñ meñ jhalaktā nahīñ armānoñ kā

mai-kade ke yahī ādāb haiñ rindo sun lo
ġham nahīñ karte haiñ TuuTe hue paimānoñ kā

saañs lene ko koī ....aur Thikānā DhūñDo
shahr jañgal sā huā jaatā hai insānoñ kā

ab haqīqat kī tahoñ tak koī kaise pahoñche
ek tūfān bapā hai yahāñ afsānoñ kā

haal kuchh ab ke juda hai tere diwanon ka
shahr mein Dher na lag jae garebanon ka

ye mera zabt hai ya teri ada ki tahzib
rang aankhon mein jhalakta nahin armanon ka

mai-kade ke yahi aadab hain rindo sun lo
gham nahin karte hain TuTe hue paimanon ka

sans lene ko koi aur Thikana DhunDo
shahr jangal sa hua jata hai insanon ka

ab haqiqat ki tahon tak koi kaise pahonche
ek tufan bapa hai yahan afsanon ka

Source: Book : Khushk Tahni Zard Pattay (Pg. 61) Author : Yousuf Taqi Publication : Yousuf Taqi (2003) Edition : 2003