sitam-zarīfī kī sūrat nikal hī aatī hai
raqīb kī bhī zarūrat nikal hī aatī hai

qadam rakheñ to kahāñ āb-o-reg-o-ḳhāk pe ham
sabhī jagah koī turbat nikal hī aatī hai

hisāb-e-qurb-o-kashish kar ke kyuuñ hoñ sharminda
mire lahū kī to qīmat nikal hī aatī hai

hai pul-sirāt kī hī bū-nisā.ī rāh-e-jahāñ
yahāñ bhī hashr kī hālat nikal hī aatī hai

baḌe zamāne se huuñ dushmanoñ kī āñkhoñ meñ
kisī meñ chashm-e-muravvat nikal hī aatī hai

maiñ mirkaza huuñ magar mirkaza bhañvar kā huuñ
kisī bhī mauj se qurbat nikal hī aatī hai

ye shā.irī hai paḌosī ke pattharoñ ke sabab
tarāshtā huuñ to jiddat nikal hī aatī hai

sitam-zarifi ki surat nikal hi aati hai
raqib ki bhi zarurat nikal hi aati hai

qadam rakhen to kahan aab-o-reg-o-KHak pe hum
sabhi jagah koi turbat nikal hi aati hai

hisab-e-qurb-o-kashish kar ke kyun hon sharminda
mere lahu ki to qimat nikal hi aati hai

hai pul-siraat ki hi bu-nisai rah-e-jahan
yahan bhi hashr ki haalat nikal hi aati hai

baDe zamane se hun dushmanon ki aankhon mein
kisi mein chashm-e-murawwat nikal hi aati hai

main mirkaza hun magar mirkaza bhanwar ka hun
kisi bhi mauj se qurbat nikal hi aati hai

ye shairi hai paDosi ke pattharon ke sabab
tarashta hun to jiddat nikal hi aati hai

Source: Book : Teksaal (Pg. 95) Author : Tafzeel Ahmad Publication : kasauti Publication (2016) Edition : 2016