ham aap qayāmat se guzar kyuuñ nahīñ jaate
jiine kī shikāyat hai to mar kyuuñ nahīñ jaate

katrāte haiñ bal khāte haiñ ghabrāte haiñ kyuuñ log
sardī hai to paanī meñ utar kyuuñ nahīñ jaate

āñkhoñ meñ namak hai to nazar kyuuñ nahīñ aatā
palkoñ pe guhar haiñ to bikhar kyuuñ nahīñ jaate

aḳhbār meñ rozāna vahī shor hai yaanī
apne se ye hālāt sañvar kyuuñ nahīñ jaate

ye baat abhī mujh ko bhī mālūm nahīñ hai
patthar idhar aate haiñ udhar kyuuñ nahīñ jaate

terī hī tarah ab ye tire hijr ke din bhī
jaate nazar aate haiñ magar kyuuñ nahīñ jaate

ab yaad kabhī aa.e to ā.īne se pūchho
'mahbūb-ḳhizāñ' shaam ko ghar kyuuñ nahīñ jaate

hum aap qayamat se guzar kyun nahin jate
jine ki shikayat hai to mar kyun nahin jate

katraate hain bal khate hain ghabraate hain kyun log
sardi hai to pani mein utar kyun nahin jate

aankhon mein namak hai to nazar kyun nahin aata
palkon pe guhar hain to bikhar kyun nahin jate

aKHbar mein rozana wahi shor hai yani
apne se ye haalat sanwar kyun nahin jate

ye baat abhi mujh ko bhi malum nahin hai
patthar idhar aate hain udhar kyun nahin jate

teri hi tarah ab ye tere hijr ke din bhi
jate nazar aate hain magar kyun nahin jate

ab yaad kabhi aae to aaine se puchho
'mahbub-KHizan' sham ko ghar kyun nahin jate