ahl-e-dil milte nahīñ ahl-e-nazar milte nahīñ
zulmat-e-daurāñ meñ ḳhurshīd-e-sahr milte nahīñ

manziloñ kī justujū kā tazkira be-sūd hai
DhūñDne niklo to ab apne hī ghar milte nahīñ

aadmī TukḌoñ kī sūrat meñ huā hai muntashir
vahdat-e-fikr-o-nazar vaale bashar milte nahīñ

rāste raushan haiñ āsār-e-safar ma.adūm haiñ
bastiyāñ maujūd haiñ dīvār-o-dar milte nahīñ

zauq-e-nazzāra diloñ meñ dafn ho kar rah gayā
aañkh vāloñ meñ bhī ab ahl-e-nazar milte nahīñ

baḌh ga.e haiñ is qadar qalb o nazar ke fāsle
saath ho kar ham-safar se ham-safar milte nahīñ

zehn kī chaTyal zamīñ se aañch aatī hai 'zahīr'
ab yahāñ ehsās ke rañgīñ shajar milte nahīñ

ahl-e-dil milte nahin ahl-e-nazar milte nahin
zulmat-e-dauran mein KHurshid-e-sahr milte nahin

manzilon ki justuju ka tazkira be-sud hai
DhunDne niklo to ab apne hi ghar milte nahin

aadmi TukDon ki surat mein hua hai muntashir
wahdat-e-fikr-o-nazar wale bashar milte nahin

raste raushan hain aasar-e-safar madum hain
bastiyan maujud hain diwar-o-dar milte nahin

zauq-e-nazzara dilon mein dafn ho kar rah gaya
aankh walon mein bhi ab ahl-e-nazar milte nahin

baDh gae hain is qadar qalb o nazar ke fasle
sath ho kar ham-safar se ham-safar milte nahin

zehn ki chaTyal zamin se aanch aati hai 'zahir'
ab yahan ehsas ke rangin shajar milte nahin