na ibtidā kī ḳhabar hai na intihā ma.alūm
rahā ye vahm ki ham haiñ so vo bhī kyā ma.alūm

duā to ḳhair duā se umīd-e-ḳhair bhī hai
ye mudda.ā hai to anjām-e-mudda.ā ma.alūm

huā na rāz-e-razā faash vo to ye kahiye
mire nasīb meñ thī varna sa.ī-e-nā-ma.alūm

mirī vafā ke sivā ġhāyat-e-jafā kyuuñ ho
tirī jafā ke sivā hāsil-e-vafā ma.alūm

kuchh un ke rahm pe thī yuuñ hī zindagī mauqūf
ki un ko rāz-e-mohabbat bhī ho gayā ma.alūm

tire ḳhayāl ke asrār be-ḳhudī meñ khule
hamīñ chhupā na sake varna dil ko kyā ma.alūm

fareb-e-amn meñ kuchh maslahat to hai varna
sukūn-e-kashtī o taufīq-e-nā-ḳhudā ma.alūm

vo iltifāt ki thā us kī intihā bhī hai
ḳhudā kī maar ki dil ko yahī na thā ma.alūm

ye zindagī kī hai rūdād-e-muḳhtasar 'fānī'
vajūd-e-dard musallam ilaaj nā-mālūm

na ibtida ki KHabar hai na intiha malum
raha ye wahm ki hum hain so wo bhi kya malum

dua to KHair dua se umid-e-KHair bhi hai
ye muddaa hai to anjam-e-muddaa malum

hua na raaz-e-raza fash wo to ye kahiye
mere nasib mein thi warna sai-e-na-malum

meri wafa ke siwa ghayat-e-jafa kyun ho
teri jafa ke siwa hasil-e-wafa malum

kuchh un ke rahm pe thi yun hi zindagi mauquf
ki un ko raaz-e-mohabbat bhi ho gaya malum

tere KHayal ke asrar be-KHudi mein khule
hamin chhupa na sake warna dil ko kya malum

fareb-e-amn mein kuchh maslahat to hai warna
sukun-e-kashti o taufiq-e-na-KHuda malum

wo iltifat ki tha us ki intiha bhi hai
KHuda ki mar ki dil ko yahi na tha malum

ye zindagi ki hai rudad-e-muKHtasar 'fani'
wajud-e-dard musallam ilaj na-malum