ġham-e-duniyā ġham-e-hastī ġham-e-ulfat ġham-e-dil
kitne unvān mile haiñ mire afsāne ko

phir se aa jā.egī dekho tan-e-be-jān meñ jaan
aap āvāz to diije zarā dīvāne ko

be-ḳhudī meñ bhī tirā naam liye jaate haiñ
rog ye kaisā lagā hai tire mastāne ko

tujh se bas itnī talab hai tire dīvāne kī
apne jalvoñ se sajā de mire ġham-ḳhāne ko

sho.ala-e-dard-e-mohabbat koī bhaḌkā.e to
ham to tayyār haiñ is aag meñ jal jaane ko

gar mirā zauq-e-jabīñ-sā.ī salāmat hai 'fanā'
ka.aba ik roz banā dūñgā sanam-ḳhāne ko

gham-e-duniya gham-e-hasti gham-e-ulfat gham-e-dil
kitne unwan mile hain mere afsane ko

phir se aa jaegi dekho tan-e-be-jaan mein jaan
aap aawaz to dije zara diwane ko

be-KHudi mein bhi tera nam liye jate hain
rog ye kaisa laga hai tere mastane ko

tujh se bas itni talab hai tere diwane ki
apne jalwon se saja de mere gham-KHane ko

shoala-e-dard-e-mohabbat koi bhaDkae to
hum to tayyar hain is aag mein jal jaane ko

gar mera zauq-e-jabin-sai salamat hai 'fana'
kaba ek roz bana dunga sanam-KHane ko