terī āñkheñ baḌī sī pyārī haiñ
un ke phir dekhne kī vaarī haiñ

gāliyāñ tiiñ jo de gayā thā mujhe
mujh ko ab tak vo yādgārī haiñ

ātish-e-ishq meñ jo jal na mareñ
ishq ke fan meñ vo anārī haiñ

raat jaagā hai pī sharāb kahīñ
terī āñkheñ nipaT ḳhumārī haiñ

tum se kahtā hai jaan sach 'tābāñ'
jhūTī bāteñ sabhī tumhārī haiñ

teri aankhen baDi si pyari hain
un ke phir dekhne ki wari hain

galiyan tin jo de gaya tha mujhe
mujh ko ab tak wo yaadgari hain

aatish-e-ishq mein jo jal na maren
ishq ke fan mein wo anari hain

raat jaga hai pi sharab kahin
teri aankhen nipaT KHumari hain

tum se kahta hai jaan sach 'taban'
jhuTi baaten sabhi tumhaari hain