phir vahī reg-e-bayābāñ kā hai manzar aur ham
phir muqābil meñ hai ik zālim kā lashkar aur ham

raat ko pichhle pahar koī bulātā hai hameñ
aur lipaT kar roz so jaate haiñ chādar aur ham

zaḳhm-e-sar kī dāstāñ ab yaad bhī aatī nahīñ
āshnā the kis qadar pahle ye patthar aur ham

ab to ik muddat se haiñ dīvār-o-dar kī qaid meñ
saath rahte the kabhī sahrā samundar aur ham

sirf bachchoñ kī mohabbat meñ ye rusvā.ī huī
varnā sāhil par banāte ret kā ghar aur ham

rāhgīroñ ne hameñ pahchān kar sikke diye
haath phailā.e khaḌe the jab sikandar aur ham

ye havelī bhī kabhī ābād to hogī magar
ab yahāñ muddat se rahte haiñ kabūtar aur ham

rahnumā.ī ke liye koī sitāra bhej de
kab talak bhaTkeñge yūñhī ḳhāk-bar-sar aur ham

phir wahi reg-e-bayaban ka hai manzar aur hum
phir muqabil mein hai ek zalim ka lashkar aur hum

raat ko pichhle pahar koi bulata hai hamein
aur lipaT kar roz so jate hain chadar aur hum

zaKHm-e-sar ki dastan ab yaad bhi aati nahin
aashna the kis qadar pahle ye patthar aur hum

ab to ek muddat se hain diwar-o-dar ki qaid mein
sath rahte the kabhi sahra samundar aur hum

sirf bachchon ki mohabbat mein ye ruswai hui
warna sahil par banate ret ka ghar aur hum

rahgiron ne hamein pahchan kar sikke diye
hath phailae khaDe the jab sikandar aur hum

ye haweli bhi kabhi aabaad to hogi magar
ab yahan muddat se rahte hain kabutar aur hum

rahnumai ke liye koi sitara bhej de
kab talak bhaTkenge yunhi KHak-bar-sar aur hum

Videos
This video is playing from YouTube Videos
This video is playing from YouTube Wali Aasi RECITATIONS Nomaan Shauque



00:00/00:00 phir wahi reg-e-bayaban ka hai manzar aur hum Nomaan Shauque

Source: Book : Mom (Pg. 39)