lutf ho hashr meñ kuchh baat banā.e na bane
aañkh bhī shoḳh sitam-gar se churā.e na bane

mujh ko uThvā to diyā us ne bharī mahfil se
kaun thā ye koī pūchhe to batā.e na bane

baat saarī ye hai vo zid pe aḌe baiThe haiñ
yaad kī bhuul ho to laakh jatā.e na bane

tum se ab kyā kaheñ vo chiiz hai dāġh-e-ġham-e-ishq
ki chhupā.e na chhupe aur dikhā.e na bane

sīdhī bātoñ pe hai matlūb sanad aur subūt
haiñ vo kaj-bahas zabāñ un se milā.e na bane

fat.h kā raaz hai sābit-qadmī aur himmat
kaam bhī hai koī aisā ki banā.e na bane

baat vo kah ga.e aa.e bhī to kis tarah yaqīñ
aur sehr is meñ kuchh aisā hai bhulā.e na bane

be-kasī kī hai musībat meñ shikāyat be-sūd
kab paḌā vaqt ki apne bhī parā.e na bane

ġham jo pyāre se mile kyuuñ na ho vo bhī pyārā
bhūlnā bhī use chāheñ to bhulā.e na bane

hai nazar meñ vo samāñ naqsh hai jis kā dil par
dard vo naam hai lab tak jise laa.e na bane

be-ḳhudī kā hai jahāñ be-asar naaz o niyāz
sarkashī bhī na chale sar bhī jhukā.e na bane

āh-e-sard aur bhī bhaḌkātī hai shola dil meñ
ye diyā vo hai jo phūñkoñ se bujhā.e na bane

sard āzād hai dil rashk o numā.ish hai abas
ḳhaar khaa.e na bane gul bhī khilā.e na bane

ain yak-rañgī hai nairañg-e-tamāshā har chand
ye vo uryānī kā parda hai uThā.e na bane

be-ḳhudī meñ bhī to 'kaifī' kī ye ḳhuddārī hai
hāl-e-dil pūchh bhī leñ vo to sunā.e na bane

lutf ho hashr mein kuchh baat banae na bane
aankh bhi shoKH sitam-gar se churae na bane

mujh ko uThwa to diya us ne bhari mahfil se
kaun tha ye koi puchhe to batae na bane

baat sari ye hai wo zid pe aDe baiThe hain
yaad ki bhul ho to lakh jatae na bane

tum se ab kya kahen wo chiz hai dagh-e-gham-e-ishq
ki chhupae na chhupe aur dikhae na bane

sidhi baaton pe hai matlub sanad aur subut
hain wo kaj-bahas zaban un se milae na bane

fath ka raaz hai sabit-qadmi aur himmat
kaam bhi hai koi aisa ki banae na bane

baat wo kah gae aae bhi to kis tarah yaqin
aur sehr is mein kuchh aisa hai bhulae na bane

be-kasi ki hai musibat mein shikayat be-sud
kab paDa waqt ki apne bhi parae na bane

gham jo pyare se mile kyun na ho wo bhi pyara
bhulna bhi use chahen to bhulae na bane

hai nazar mein wo saman naqsh hai jis ka dil par
dard wo nam hai lab tak jise lae na bane

be-KHudi ka hai jahan be-asar naz o niyaz
sarkashi bhi na chale sar bhi jhukae na bane

aah-e-sard aur bhi bhaDkati hai shola dil mein
ye diya wo hai jo phunkon se bujhae na bane

sard aazad hai dil rashk o numaish hai abas
KHar khae na bane gul bhi khilae na bane

ain yak-rangi hai nairang-e-tamasha har chand
ye wo uryani ka parda hai uThae na bane

be-KHudi mein bhi to 'kaifi' ki ye KHuddari hai
haal-e-dil puchh bhi len wo to sunae na bane