lamha guzar gayā hai ki arsa guzar gayā
hai kaun vo jo vaqt kī sāzish ye kar gayā

ab umr to ye biit chalī sochte tumheñ
itnā huā hai haañ ki zarā maiñ sañvar gayā

simTā thā jab talak vo hathelī meñ Thiik thā
pahuñchā laboñ pe lams to nas-nas bikhar gayā

yuuñ to dahak rahā thā vo sūraj sā duur se
jo paas jā ke chhū liyā kaisā sihar gayā

dekhūñ tujhe qarīb se fursat se chain se
merā ye ḳhvāb mujh ko liye dar-ba-dar gayā

ik roz terā naam sar-e-rāh le liyā
chaltā huā ye shaġhl achānak Thahar gayā

misra.a sisak rahā thā akelā jo der se
yaad us kī aa ga.ī to ġhazal meñ utar gayā

lamha guzar gaya hai ki arsa guzar gaya
hai kaun wo jo waqt ki sazish ye kar gaya

ab umr to ye bit chali sochte tumhein
itna hua hai han ki zara main sanwar gaya

simTa tha jab talak wo hatheli mein Thik tha
pahuncha labon pe lams to nas-nas bikhar gaya

yun to dahak raha tha wo suraj sa dur se
jo pas ja ke chhu liya kaisa sihar gaya

dekhun tujhe qarib se fursat se chain se
mera ye KHwab mujh ko liye dar-ba-dar gaya

ek roz tera nam sar-e-rah le liya
chalta hua ye shaghl achanak Thahar gaya

misra sisak raha tha akela jo der se
yaad us ki aa gai to ghazal mein utar gaya