apne qadam kī chaap se yuuñ Dar rahe haiñ ham
maqtal kī samt jaise safar kar rahe haiñ ham

kyā chāñd aur tāroñ ko ham jānte nahīñ
ai āsmān vaalo zamīñ par rahe haiñ ham

mushkil thā sat.h-e-āb se ham ko khañgālnā
bāhar nahīñ the jitnā ki andar rahe haiñ ham

kal aur koī vaqt kī āñkhoñ meñ ho to kyā
ab tak to har nigāh kā mehvar rahe haiñ ham

dair-o-haram se aur bhī aage nikal ga.e
haañ aql kī hudūd se bāhar rahe haiñ ham

ai ham-safar na pūchh masāfat nasīb se
tū jāntā hai kitne dinoñ ghar rahe haiñ ham

bāhar na aa.e ham bhī anā ke hisār se
is jañg meñ tumhāre barābar rahe haiñ ham

jharnoñ kī kyā bisāt kareñ guftugū 'fahīm'
dariyā gire jahāñ vo samundar rahe haiñ ham

apne qadam ki chap se yun Dar rahe hain hum
maqtal ki samt jaise safar kar rahe hain hum

kya chand aur taron ko hum jaante nahin
ai aasman walo zamin par rahe hain hum

mushkil tha sath-e-ab se hum ko khangalna
bahar nahin the jitna ki andar rahe hain hum

kal aur koi waqt ki aankhon mein ho to kya
ab tak to har nigah ka mehwar rahe hain hum

dair-o-haram se aur bhi aage nikal gae
han aql ki hudud se bahar rahe hain hum

ai ham-safar na puchh masafat nasib se
tu jaanta hai kitne dinon ghar rahe hain hum

bahar na aae hum bhi ana ke hisar se
is jang mein tumhaare barabar rahe hain hum

jharnon ki kya bisat karen guftugu 'fahim'
dariya gire jahan wo samundar rahe hain hum

Source: Book : Adhoori Baat (Pg. 27) Author : Faheem Jogapuri Publication : Rehmania Foundation, Azad Nagar, Bihar (2009) Edition : 2009