Subscribe to our newsletter and get our newest updates

Prem Kumar Nazar

  • Ghazal


waqt qarib hai phir manzar ke badalne ka


vaqt qarīb hai phir manzar ke badalne kā
sūraj kī zid dekho ye nahīñ Dhalne kā

maiñ bhī talāsh-e-āb-e-havas meñ niklā huuñ
shor sunā thā ik chashme ke ubalne kā

ahl-e-junūñ kyuuñ dasht meñ aanā chhoḌ diyā
bhuul ga.e fan nok-e-ḳhār pe chalne kā

sub.h talak is shahr meñ jaane kyā ho jaa.e
rishta DhūñDho rātoñ-rāt nikalne kā

yād-e-yār kā aa jaanā bhī Thiik sahī
raaz magar gahrā hai dil ke machalne kā

waqt qarib hai phir manzar ke badalne ka
suraj ki zid dekho ye nahin Dhalne ka

main bhi talash-e-ab-e-hawas mein nikla hun
shor suna tha ek chashme ke ubalne ka

ahl-e-junun kyun dasht mein aana chhoD diya
bhul gae fan nok-e-KHar pe chalne ka

subh talak is shahr mein jaane kya ho jae
rishta DhunDho raaton-raat nikalne ka

yaad-e-yar ka aa jaana bhi Thik sahi
raaz magar gahra hai dil ke machalne ka


Source: Book : Lauh-e-Jahan (Pg. 59)

Leave a comment

+