tum ne likkhā hai likho kaisā huuñ maiñ
dostoñ kī bhiiḌ hai tanhā huuñ maiñ

yāsmīn o nastaran merā pata
ḳhushbuoñ ke jism par likhā huuñ maiñ

pahle hī kyā kam tamāshe the yahāñ
phir na.e manzar uThā laayā huuñ maiñ

phir vahī mausam purāne ho ga.e
din Dhale sargoshiyāñ suntā huuñ maiñ

kaun utartī chaḌhtī sāñsoñ kā amiiñ
sāya-e-dīvār se lipTā huuñ maiñ

tū kabhī is shahr se ho kar guzar
rāstoñ ke jaal meñ uljhā huuñ maiñ

vo mirī ḳhush-fahmiyāñ sab kyā huiiñ
jaane kab se be-hunar zinda huuñ maiñ

tum ne likkha hai likho kaisa hun main
doston ki bhiD hai tanha hun main

yasmin o nastaran mera pata
KHushbuon ke jism par likha hun main

pahle hi kya kam tamashe the yahan
phir nae manzar uTha laya hun main

phir wahi mausam purane ho gae
din Dhale sargoshiyan sunta hun main

kaun utarti chaDhti sanson ka amin
saya-e-diwar se lipTa hun main

tu kabhi is shahr se ho kar guzar
raston ke jal mein uljha hun main

wo meri KHush-fahmiyan sab kya huin
jaane kab se be-hunar zinda hun main