yuuñ to sau tarah kī mushkil suḳhanī aa.e hameñ
par vo ik baat jo kuhnī na abhī aa.e hameñ

kaise toḌeñ use jo TuuT ke miltī ho gale
laakh chāhā ki rivāyat-shikanī aa.e hameñ

har qadam is mutabādil se bharī duniyā meñ
raas aa.e to bas ik terī kamī aa.e hameñ

pyaas bujh jaa.e zamīñ sabz ho manzar dhul jaa.e
kaam kyā kyā na in āñkhoñ kī tirī aa.e hameñ

dev-e-alfāz ke changul se chhuḌāne ke liye
āḳhir-e-shab koī ma.anā kī parī aa.e hameñ

phir hameñ qatl kare shauq se ban paa.e agar
ik ġhazal bhar to kisī shab koī jī aa.e hameñ

'sāz' ye shahr-navardī meñ bikhartā huā din
simTe ik moḌ to yaad us kī galī aa.e hameñ

yun to sau tarah ki mushkil suKHani aae hamein
par wo ek baat jo kuhni na abhi aae hamein

kaise toDen use jo TuT ke milti ho gale
lakh chaha ki riwayat-shikani aae hamein

har qadam is mutabaadil se bhari duniya mein
ras aae to bas ek teri kami aae hamein

pyas bujh jae zamin sabz ho manzar dhul jae
kaam kya kya na in aankhon ki teri aae hamein

dew-e-alfaz ke changul se chhuDane ke liye
aaKHir-e-shab koi mana ki pari aae hamein

phir hamein qatl kare shauq se ban pae agar
ek ghazal bhar to kisi shab koi ji aae hamein

'saz' ye shahr-nawardi mein bikharta hua din
simTe ek moD to yaad us ki gali aae hamein

Source: Book : sargoshiyan zamanon ki (Pg. 92)