adā adā tirī mauj-e-sharāb ho ke rahī
nigāh-e-mast se duniyā ḳharāb ho ke rahī

ġhazab thā un kā talavvun ki chaar hī din meñ
nigāh-e-lutf nigāh-e-itāb ho ke rahī

tirī galī kī havā dil ko raas kyā aatī
huā ye haal ki miTTī ḳharāb ho ke rahī

vo āh-e-dil jise sun sun ke aap hañste the
ḳhadañg-e-nāz kā āḳhir javāb ho ke rahī

paḌī thī kisht-e-tamannā jo ḳhushk muddat se
rahīn-e-minnat-e-chashm-e-pur-āb ho ke rahī

hamārī kashtī-e-tauba kā ye huā anjām
bahār aate hī ġharq-e-sharāb ho ke rahī

kisī meñ taab kahāñ thī ki dekhtā un ko
uThī naqāb to hairat naqāb ho ke rahī

vo bazm-e-aish jo rahtī thī garm rātoñ ko
fasāna ho ke rahī ek ḳhvāb ho ke rahī

'jalīl' fasl-e-bahārī kī dekhiye tāsīr
girī jo buuñd ghaTā se sharāb ho ke rahī

ada ada teri mauj-e-sharab ho ke rahi
nigah-e-mast se duniya KHarab ho ke rahi

ghazab tha un ka talawwun ki chaar hi din mein
nigah-e-lutf nigah-e-itab ho ke rahi

teri gali ki hawa dil ko ras kya aati
hua ye haal ki miTTi KHarab ho ke rahi

wo aah-e-dil jise sun sun ke aap hanste the
KHadang-e-naz ka aaKHir jawab ho ke rahi

paDi thi kisht-e-tamanna jo KHushk muddat se
rahin-e-minnat-e-chashm-e-pur-ab ho ke rahi

hamari kashti-e-tauba ka ye hua anjam
bahaar aate hi gharq-e-sharab ho ke rahi

kisi mein tab kahan thi ki dekhta un ko
uThi naqab to hairat naqab ho ke rahi

wo bazm-e-aish jo rahti thi garm raaton ko
fasana ho ke rahi ek KHwab ho ke rahi

'jalil' fasl-e-bahaari ki dekhiye tasir
giri jo bund ghaTa se sharab ho ke rahi

Source: Book : Kainat-e-Jalil Manakpuri (Pg. 348)