koī muzhda na bashārat na duā chāhtī hai
roz ik taaza ḳhabar ḳhalq-e-ḳhudā chāhtī hai

mauj-e-ḳhūñ sar se guzarnī thī so vo bhī guzrī
aur kyā kūcha-e-qātil kī havā chāhtī hai

shahr-e-be-mehr meñ lab-basta ġhulāmoñ kī qatār
na.e ā.īn-e-asīrī kī binā chāhtī hai

koī bole ke na bole qadam uTTheñ na uTheñ
vo jo ik dil meñ hai dīvār uThā chāhtī hai

ham bhī labbaik kaheñ aur fasāna ban jaa.eñ
koī āvāz sar-e-koh-e-nidā chāhtī hai

yahī lau thī ki ulajhtī rahī har raat ke saath
ab ke ḳhud apnī havāoñ meñ bujhā chāhtī hai

ahd-e-āsūdgi-e-jāñ meñ bhī thā jaañ se aziiz
vo qalam bhī mire dushman kī anā chāhtī hai

bahr-e-pāmāli-e-gul aa.ī hai aur mauj-e-ḳhizāñ
guftugū meñ ravish-e-bād-e-sabā chāhtī hai

ḳhaak ko ham-sar-e-mahtāb kiyā raat kī raat
ḳhalq ab bhī vahī naqsh-e-kaf-e-pā chāhtī hai

koi muzhda na bashaarat na dua chahti hai
roz ek taza KHabar KHalq-e-KHuda chahti hai

mauj-e-KHun sar se guzarni thi so wo bhi guzri
aur kya kucha-e-qatil ki hawa chahti hai

shahr-e-be-mehr mein lab-basta ghulamon ki qatar
nae aain-e-asiri ki bina chahti hai

koi bole ke na bole qadam uTThen na uThen
wo jo ek dil mein hai diwar uTha chahti hai

hum bhi labbaik kahen aur fasana ban jaen
koi aawaz sar-e-koh-e-nida chahti hai

yahi lau thi ki ulajhti rahi har raat ke sath
ab ke KHud apni hawaon mein bujha chahti hai

ahd-e-asudgi-e-jaan mein bhi tha jaan se aziz
wo qalam bhi mere dushman ki ana chahti hai

bahr-e-pamali-e-gul aai hai aur mauj-e-KHizan
guftugu mein rawish-e-baad-e-saba chahti hai

KHak ko ham-sar-e-mahtab kiya raat ki raat
KHalq ab bhi wahi naqsh-e-kaf-e-pa chahti hai