mumkin hai ki milte koī dam donoñ kināre
ik mauj ke muhtāj the ham donoñ kināre

yuuñ aañkh jhapaktā nahīñ bahtā huā paanī
manzar meñ na ho jaa.eñ baham donoñ kināre

ābād hamesha hī rahegā ye samundar
rakhte haiñ machheroñ kā bharam donoñ kināre

tā-umr kisī maja-e-ḳhush-rau kī havas meñ
bedār rahe dam hama-dam donoñ kināre

khultī hai yahāñ aa ke mire ḳhvāb kī vus.at
hote haiñ mirī aañkh meñ zam donoñ kināre

ye fāsla miTTī se kabhī tai nahīñ hogā
dariyā kī haiñ vus.at pe qasam donoñ kināre

sab sair ko nikleñge sar-e-sāhil-e-har-ḳhvāb
sayyāhoñ ke chūmeñge qadam donoñ kināre

kashtī kī tarah umr ḳhizar-gīr hai 'āzar'
hastī ke haiñ maujūd-o-adam donoñ kināre

mumkin hai ki milte koi dam donon kinare
ek mauj ke muhtaj the hum donon kinare

yun aankh jhapakta nahin bahta hua pani
manzar mein na ho jaen baham donon kinare

aabaad hamesha hi rahega ye samundar
rakhte hain machheron ka bharam donon kinare

ta-umr kisi maja-e-KHush-rau ki hawas mein
bedar rahe dam hama-dam donon kinare

khulti hai yahan aa ke mere KHwab ki wusat
hote hain meri aankh mein zam donon kinare

ye fasla miTTi se kabhi tai nahin hoga
dariya ki hain wusat pe qasam donon kinare

sab sair ko niklenge sar-e-sahil-e-har-KHwab
sayyahon ke chumenge qadam donon kinare

kashti ki tarah umr KHizar-gir hai 'azar'
hasti ke hain maujud-o-adam donon kinare