apnā muhāsba kabhī karne nahīñ diyā
ḳhud-bīniyoñ ne ham ko sañvarne nahīñ diyā

hālāt ne agarche sujhā.ī gadāgarī
merī anā ne mujh ko bikharne nahīñ diyā

tūfāñ se khelne kā rahā shauq umr bhar
sāhil pe jis ne mujh ko utarne nahīñ diyā

almāriyoñ meñ qaid rahā apnā saarā ilm
qalb-o-nazar ko ham ne nikharne nahīñ diyā

duniyā se kab kā uTh gayā hotā maiñ ai sanam
lekin tire ḳhayāl ne marne nahīñ diyā

manzil to mere sāmne aatī rahī 'obaid'
josh-e-junūñ ne mujh ko Thaharne nahīñ diyā

apna muhasba kabhi karne nahin diya
KHud-biniyon ne hum ko sanwarne nahin diya

haalat ne agarche sujhai gadagari
meri ana ne mujh ko bikharne nahin diya

tufan se khelne ka raha shauq umr bhar
sahil pe jis ne mujh ko utarne nahin diya

almariyon mein qaid raha apna sara ilm
qalb-o-nazar ko hum ne nikharne nahin diya

duniya se kab ka uTh gaya hota main ai sanam
lekin tere KHayal ne marne nahin diya

manzil to mere samne aati rahi 'obaid'
josh-e-junun ne mujh ko Thaharne nahin diya

Source: Book : Aawaz Ke Saye (Poetry) (Pg. 49) Author : Obaidur Rahman Publication : Sehla Obaid (2001) Edition : 2001