har sitam lutf hai dil ḳhūgar-e-āzār kahāñ
sach kahā tum ne mujhe ġham se sarokār kahāñ
dasht-o-sahrā ke kuchh ādāb huā karte haiñ
kyuuñ bhaTakte ho yahāñ sāya-e-dīvār kahāñ
bāda-e-shauq se labrez hai sāġhar merā
kaise azkār mujhe fursat-e-afkār kahāñ
kyuuñ tire daur meñ mahrūm-e-sazā huuñ ki mujhe
jurm par naaz sahī jurm se inkār kahāñ
rah-rav-e-shauq hai begāna-e-manzil varna
kūcha-e-dār kahāñ kūcha-e-dildār kahāñ
sochte kyā ho jalāte raho zaḳhmoñ ke charāġh
dekhte kyā ho abhī sub.h ke āsār kahāñ
tum ko chāhā thā magar tum bhī vafā-dost nahīñ
dil pe takiya thā magar dil bhī vafādār kahāñ
yuuñ to har gaam pe ġham-ḳhvār mile haiñ 'tābāñ'
jo mire ġham ko samajh paa.e vo ġham-ḳhvār kahāñ
har sitam lutf hai dil KHugar-e-azar kahan
sach kaha tum ne mujhe gham se sarokar kahan
dasht-o-sahra ke kuchh aadab hua karte hain
kyun bhaTakte ho yahan saya-e-diwar kahan
baada-e-shauq se labrez hai saghar mera
kaise azkar mujhe fursat-e-afkar kahan
kyun tere daur mein mahrum-e-saza hun ki mujhe
jurm par naz sahi jurm se inkar kahan
rah-raw-e-shauq hai begana-e-manzil warna
kucha-e-dar kahan kucha-e-dildar kahan
sochte kya ho jalate raho zaKHmon ke charagh
dekhte kya ho abhi subh ke aasar kahan
tum ko chaha tha magar tum bhi wafa-dost nahin
dil pe takiya tha magar dil bhi wafadar kahan
yun to har gam pe gham-KHwar mile hain 'taban'
jo mere gham ko samajh pae wo gham-KHwar kahan
Source: Funoon(Jadeed Ghazal Number: Volume-002)
Leave a comment