vasl kī shab meñ bhī ham bāham digar royā kiye
maiñ judā.ī se vo mere haal par royā kiye

us ne zaanū ġhair kā apne rakhā jab zer-e-sar
apne zaanū par ham apnā rakh ke sar royā kiye

us ne aañsū ġhair ke poñchhe jab apne haath se
ham-nashīñ ye mājrā ham dekh kar royā kiye

ho gayā mushkil mirī mizhgāñ se mizhgāñ kā milāp
haa.il ik dariyā huā ham is qadar royā kiye

surḳh-rū be-ābrūī meñ bhī ham 'san.at' rahe
ḳhushk jab aañsū hue laḳht-e-jigar royā kiye

wasl ki shab mein bhi hum baham digar roya kiye
main judai se wo mere haal par roya kiye

us ne zanu ghair ka apne rakha jab zer-e-sar
apne zanu par hum apna rakh ke sar roya kiye

us ne aansu ghair ke ponchhe jab apne hath se
ham-nashin ye majra hum dekh kar roya kiye

ho gaya mushkil meri mizhgan se mizhgan ka milap
hail ek dariya hua hum is qadar roya kiye

surKH-ru be-abrui mein bhi hum 'sanat' rahe
KHushk jab aansu hue laKHt-e-jigar roya kiye

Source: Book : Noquush (Pg. B-410 E420) Publication : Nuqoosh Press Lahore (May June 1954) Edition : May June 1954