hai āfat-e-jāñ husn kī shoḳhī bhī adā bhī
hoñToñ pe tabassum bhī hai nazroñ meñ hayā bhī

shāmil tirī āvāz meñ tāroñ kī navā bhī
sharminda tire nuur se kirnoñ kī ziyā bhī

mahfil hai ki mutrib ke ishāroñ pe miTī hai
suntā hai koī sāz-e-shikasta kī sadā bhī

rakhtā hai baġhāvat ke sharāre bhī nazar meñ
ye ishq jo hai paikar-e-taslīm-o-razā bhī

ruḳh pher diyā tund havāoñ kā kisī ne
hālāt se apne koī majbūr rahā bhī

bach kar hī chale ham to zamāne kī ravish se
āzād-ravī kā hameñ ehsās huā bhī

akasr lab-e-la.alīñ ke tabassum kī kiran ne
ummīd ke ḳhākoñ meñ nayā rañg bharā bhī

ai 'naqsh' kareñ soz-e-tamannā kā bayāñ kyā
sau baar diyā dil kā jalā bhī hai bujhā bhī

hai aafat-e-jaan husn ki shoKHi bhi ada bhi
honTon pe tabassum bhi hai nazron mein haya bhi

shamil teri aawaz mein taron ki nawa bhi
sharminda tere nur se kirnon ki ziya bhi

mahfil hai ki mutrib ke ishaaron pe miTi hai
sunta hai koi saz-e-shikasta ki sada bhi

rakhta hai baghawat ke sharare bhi nazar mein
ye ishq jo hai paikar-e-taslim-o-raza bhi

ruKH pher diya tund hawaon ka kisi ne
haalat se apne koi majbur raha bhi

bach kar hi chale hum to zamane ki rawish se
aazad-rawi ka hamein ehsas hua bhi

akasr lab-e-lalin ke tabassum ki kiran ne
ummid ke KHakon mein naya rang bhara bhi

ai 'naqsh' karen soz-e-tamanna ka bayan kya
sau bar diya dil ka jala bhi hai bujha bhi

Source: Book : Andaaz (Pg. 148) Author : Mahesh Chandr Naqsh Publication : Sangam Kitab Ghar,  Delhi (1962) Edition : 1962