ham duniyā se jab tañg aayā karte haiñ
apne saath ik shaam manāyā karte haiñ

sūraj ke us jānib basne vaale log
aksar ham ko paas bulāyā karte haiñ

yūñhī ḳhud se rūThā karte haiñ pahle
der talak phir ḳhud ko manāyā karte haiñ

chup rahte haiñ us ke sāmne jā kar ham
yuuñ us ko chakh yaad dilāyā karte haiñ

nīndoñ ke vīrān jazīre par har shab
ḳhvāboñ kā ik shahr basāyā karte haiñ

in ḳhvāboñ kī qīmat ham se pūchh ki ham
in ke sahāre umr bitāyā karte haiñ

ab to koī bhī duur nahīñ to phir 'taimūr'
ham ḳhat kis ke naam likhāyā karte haiñ

hum duniya se jab tang aaya karte hain
apne sath ek sham manaya karte hain

suraj ke us jaanib basne wale log
aksar hum ko pas bulaya karte hain

yunhi KHud se ruTha karte hain pahle
der talak phir KHud ko manaya karte hain

chup rahte hain us ke samne ja kar hum
yun us ko chakh yaad dilaya karte hain

nindon ke viran jazire par har shab
KHwabon ka ek shahr basaya karte hain

in KHwabon ki qimat hum se puchh ki hum
in ke sahaare umr bitaya karte hain

ab to koi bhi dur nahin to phir 'taimur'
hum KHat kis ke nam likhaya karte hain