bahut aziiz thā aalam vo dil-figārī kā
sukūñ ne chhīn liyā lutf be-qarārī kā

hameñ bhī ḳhū thī zamānoñ se dil jalāne kī
unheñ bhī shauq purānā thā shola-bārī kā

diloñ meñ un ke rahā iztirāb roz-o-shab
vo jin ke sar pe rahā bojh tāj-dārī kā

vo jaate jaate mujhe apne ġham bhī sauñp gayā
ajiib Dhañg nikālā hai ġham-gusārī kā

kahā thā tum se ai 'āzim' sambhal sambhal ke chalo
bharam na rakkhā magar tum ne parda-dārī kā

bahut aziz tha aalam wo dil-figari ka
sukun ne chhin liya lutf be-qarari ka

hamein bhi KHu thi zamanon se dil jalane ki
unhen bhi shauq purana tha shola-bari ka

dilon mein un ke raha iztirab roz-o-shab
wo jin ke sar pe raha bojh taj-dari ka

wo jate jate mujhe apne gham bhi saunp gaya
ajib Dhang nikala hai gham-gusari ka

kaha tha tum se ai 'azim' sambhal sambhal ke chalo
bharam na rakkha magar tum ne parda-dari ka