kyā duā-e-farsūda harf-e-be-asar māñgūñ
tishnagī meñ jiine kā ab koī hunar māñgūñ

dhuup dhuup chal kar bhī jab thake na ham-rāhī
kaise apnī ḳhātir maiñ sāya-e-shajar māñgūñ

ā.ina-navāzī se kuchh nahīñ huā hāsil
ḳhud bane jo ā.īna ab vahī hunar māñgūñ

ik taraf ta.assub hai ik taraf riyā-kārī
aisī be-panāhī meñ kyā sukūñ kā ghar māñgūñ

merī zindagī meñ jo baT na jaa.e ḳhānoñ meñ
mil sake to maiñ aisā koī bām-o-dar māñgūñ

lamha lamha tezī se ab zamīñ khisaktī hai
ḳhud safar kā aalam hai kyā koī safar māñgūñ

be-talab hī detā hai jab 'zahīr' vo sab kuchh
kis liye maiñ phir us se jins-e-mo'atabar māñgūñ

kya dua-e-farsuda harf-e-be-asar mangun
tishnagi mein jine ka ab koi hunar mangun

dhup dhup chal kar bhi jab thake na ham-rahi
kaise apni KHatir main saya-e-shajar mangun

aaina-nawazi se kuchh nahin hua hasil
KHud bane jo aaina ab wahi hunar mangun

ek taraf tassub hai ek taraf riya-kari
aisi be-panahi mein kya sukun ka ghar mangun

meri zindagi mein jo baT na jae KHanon mein
mil sake to main aisa koi baam-o-dar mangun

lamha lamha tezi se ab zamin khisakti hai
KHud safar ka aalam hai kya koi safar mangun

be-talab hi deta hai jab 'zahir' wo sab kuchh
kis liye main phir us se jins-e-mo'atabar mangun

Source: Rooh-e-Ghazal,Pachas Sala Intekhab