Subscribe to our newsletter and get our newest updates

Ghulam Rabbani Taban

  • Ghazal


hum ek umr jale sham-e-rahguzar ki tarah


ham ek umr jale sham-e-rahguzar kī tarah
ujālā ġhairoñ se kyā māñgte qamar kī tarah

kahāñ ke jaib-o-garebāñ jigar bhī chaak hue
bahār aa.ī qayāmat ke nāma-bar kī tarah

karam kaho ki sitam dil-dahī kā har andāz
utar utar sā gayā dil meñ neshtar kī tarah

na hādsoñ kī kamī hai na shorishoñ kī kamī
chaman meñ barq bhī paltī hai bāl-o-par kī tarah

na-jāne kyuuñ yahāñ vīrāniyāñ barastī haiñ
sabhī ke ghar haiñ ba-zāhir hamāre ghar kī tarah

ḳhudā kare ki sadā kārobār-e-shauq chale
jo be-niyāz ho manzil se is safar kī tarah

bas aur kyā kaheñ rūdād-e-zindagī 'tābāñ'
chaman meñ ham bhī haiñ ik shāḳh-e-be-samar kī tarah

hum ek umr jale sham-e-rahguzar ki tarah
ujala ghairon se kya mangte qamar ki tarah

kahan ke jaib-o-gareban jigar bhi chaak hue
bahaar aai qayamat ke nama-bar ki tarah

karam kaho ki sitam dil-dahi ka har andaz
utar utar sa gaya dil mein neshtar ki tarah

na hadson ki kami hai na shorishon ki kami
chaman mein barq bhi palti hai baal-o-par ki tarah

na-jaane kyun yahan viraniyan barasti hain
sabhi ke ghar hain ba-zahir hamare ghar ki tarah

KHuda kare ki sada karobar-e-shauq chale
jo be-niyaz ho manzil se is safar ki tarah

bas aur kya kahen rudad-e-zindagi 'taban'
chaman mein hum bhi hain ek shaKH-e-be-samar ki tarah


Source: Book : siip (Magzin) (Pg. 219) Author : Nasiim Durraani Publication : Fikr-e-Nau (39 (quarterly)) Edition : 1979

Leave a comment

+