Subscribe to our newsletter and get our newest updates

Tanvir Dehlvi

  • Ghazal


shoKHi-e-garmi-e-raftar dikhate na chalo


shoḳhī-e-garmī-e-raftār dikhāte na chalo
fitna-e-hashr ko sīmāb batāte na chalo

ġhair bhī karne lage naqsh-e-qadam par sajde
naqsh-e-hub dil pe raqīboñ ke biThāte na chalo

chalte chalte to na ġhairoñ se hañso bahr-e-ḳhudā
ḳhaak meñ ashk namat mujh ko milāte na chalo

nigah-e-garm se gulshan meñ na dekho gul ko
ātish-e-rashk se bulbul ko jalāte na chalo

us ke kūche se na ghabrā ke chalo ai 'tanvīr'
log pā jā.eñge āñkhoñ ko churāte na chalo

shoKHi-e-garmi-e-raftar dikhate na chalo
fitna-e-hashr ko simab batate na chalo

ghair bhi karne lage naqsh-e-qadam par sajde
naqsh-e-hub dil pe raqibon ke biThate na chalo

chalte chalte to na ghairon se hanso bahr-e-KHuda
KHak mein ashk namat mujh ko milate na chalo

nigah-e-garm se gulshan mein na dekho gul ko
aatish-e-rashk se bulbul ko jalate na chalo

us ke kuche se na ghabra ke chalo ai 'tanwir'
log pa jaenge aankhon ko churaate na chalo


Source: Intikhab-e-Sukhan,Volume-001

Leave a comment

+