maut se ziist kī takmīl nahīñ ho saktī
raushnī ḳhaak meñ tahlīl nahīñ ho saktī

mom ho jā.ūñ ki patthar se ḳhudā ho jā.ūñ
kisī sūrat mirī takmīl nahīñ ho saktī

kis liye saañs kī zanjīr se bāñdhā hai mujhe
aur kuchh sūrat-e-tazlīl nahīñ ho saktī

kis liye zinda huuñ maiñ kis ke liye zinda huuñ
jurm aisā hai ki tāvīl nahīñ ho saktī

in añdheroñ meñ lahū-rañg saveroñ kī 'najīb'
kyā firozāñ koī qindīl nahīñ ho saktī

maut se zist ki takmil nahin ho sakti
raushni KHak mein tahlil nahin ho sakti

mom ho jaun ki patthar se KHuda ho jaun
kisi surat meri takmil nahin ho sakti

kis liye sans ki zanjir se bandha hai mujhe
aur kuchh surat-e-tazlil nahin ho sakti

kis liye zinda hun main kis ke liye zinda hun
jurm aisa hai ki tawil nahin ho sakti

in andheron mein lahu-rang saweron ki 'najib'
kya firozan koi qindil nahin ho sakti

Source: Book : Ibaraten (Pg. 33)