sitam dekho ki jo khoTā nahīñ hai
chalan meñ bas vahī sikka nahīñ hai

namak zaḳhmoñ pe ab maltā nahīñ hai
ye lagtā hai vo ab merā nahīñ hai

yahāñ par silsila hai āñ.suoñ kā
diyā ghar meñ mire bujhtā nahīñ hai

yahī rishta hameñ joḌe hue hai
ki donoñ kā koī apnā nahīñ hai

na.e din meñ na.e kirdār meñ huuñ
mirā apnā koī chehra nahīñ hai

mirī kyā aarzū hai kyā batā.ūñ
mirā dil mujh pe bhī khultā nahīñ hai

mire hāthoñ ke zaḳhmoñ kī badaulat
tirī rāhoñ meñ ik kāñTā nahīñ hai

safar meñ saath ho guzrā zamāna
thakan kā phir patā chaltā nahīñ hai

mujhe shak hai tirī maujūdgī par
tū dil meñ hai mire ab yā nahīñ hai

tirī yādoñ ko maiñ ignore kar duuñ
magar ye dil mirī suntā nahīñ hai

zarā sā vaqt do rishte ko 'kānhā'
ye dhāga to bahut uljhā nahīñ hai

sitam dekho ki jo khoTa nahin hai
chalan mein bas wahi sikka nahin hai

namak zaKHmon pe ab malta nahin hai
ye lagta hai wo ab mera nahin hai

yahan par silsila hai aansuon ka
diya ghar mein mere bujhta nahin hai

yahi rishta hamein joDe hue hai
ki donon ka koi apna nahin hai

nae din mein nae kirdar mein hun
mera apna koi chehra nahin hai

meri kya aarzu hai kya bataun
mera dil mujh pe bhi khulta nahin hai

mere hathon ke zaKHmon ki badaulat
teri rahon mein ek kanTa nahin hai

safar mein sath ho guzra zamana
thakan ka phir pata chalta nahin hai

mujhe shak hai teri maujudgi par
tu dil mein hai mere ab ya nahin hai

teri yaadon ko main ignore kar dun
magar ye dil meri sunta nahin hai

zara sa waqt do rishte ko 'kanha'
ye dhaga to bahut uljha nahin hai

Videos
This video is playing from YouTube Videos
This video is playing from YouTube Prakhar Malviya Kanha