Subscribe to our newsletter and get our newest updates

Nafas Ambalvi

  • Ghazal


ab kisi ko kya bataen kis qadar nadan the


ab kisī ko kyā batā.eñ kis qadar nādān the
ham vahīñ kashtī ko le aa.e jahāñ tūfān the

kuchh taḌaptī ārzūeñ chand be-ma.anī savāl
kārvāñ meñ sab ke sar par bas yahī sāmān the

ham ne is duniyā ke mai-ḳhāne meñ ye dekhā fareb
bas vahī pyāse rahe jo sāhib-e-īmān the

zalzaloñ par aa gayā ilzām achchhā hī huā
varna is taḳhrīb ke pahle se bhī imkān the

un ġhamoñ ne dil meñ sadiyoñ ke vasīle kar liye
jo faqat do-chār din ke vāste mehmān the

bas yahī sach hai ki ham ab un kī mahkūmī meñ haiñ
jo 'nafas' apnī havelī meñ kabhī darbān the

ab kisi ko kya bataen kis qadar nadan the
hum wahin kashti ko le aae jahan tufan the

kuchh taDapti aarzuen chand be-mani sawal
karwan mein sab ke sar par bas yahi saman the

hum ne is duniya ke mai-KHane mein ye dekha fareb
bas wahi pyase rahe jo sahib-e-iman the

zalzalon par aa gaya ilzam achchha hi hua
warna is taKHrib ke pahle se bhi imkan the

un ghamon ne dil mein sadiyon ke wasile kar liye
jo faqat do-chaar din ke waste mehman the

bas yahi sach hai ki hum ab un ki mahkumi mein hain
jo 'nafas' apni haweli mein kabhi darban the


Leave a comment

+