phir se ārā.ish-e-hastī ke jo sāmāñ hoñge
tere jalvoñ hī se ābād shabistāñ hoñge

ishq kī manzil-e-avval pe Thaharne vaalo
is se aage bhī ka.ī dasht-o-bayābāñ hoñge

tū jahāñ jā.egī ġhārat-gar-e-hastī ban kar
ham bhī ab saath tire gardish-e-daurāñ hoñge

kis qadar saḳht hai ye tark-o-talab kī manzil
ab kabhī un se mile bhī to pashemāñ hoñge

tere jalvoñ se jo mahrūm rahe haiñ ab tak
vahī āḳhir tire jalvoñ ke nigahbāñ hoñge

ab to majbūr haiñ par hashr kā din aane de
tujh se insāf-talab rū-e-gurezāñ hoñge

jab kabhī ham ne kiyā ishq pashemān hue
zindagī hai to abhī aur pashemāñ hoñge

koī bhī ġham ho ġham-e-dil ki ġham-e-dahr 'hafīz'
ham ba-har-hāl ba-har-rañg ġhazal-ḳhvāñ hoñge

phir se aaraish-e-hasti ke jo saman honge
tere jalwon hi se aabaad shabistan honge

ishq ki manzil-e-awwal pe Thaharne walo
is se aage bhi kai dasht-o-bayaban honge

tu jahan jaegi ghaarat-gar-e-hasti ban kar
hum bhi ab sath tere gardish-e-dauran honge

kis qadar saKHt hai ye tark-o-talab ki manzil
ab kabhi un se mile bhi to pasheman honge

tere jalwon se jo mahrum rahe hain ab tak
wahi aaKHir tere jalwon ke nigahban honge

ab to majbur hain par hashr ka din aane de
tujh se insaf-talab ru-e-gurezan honge

jab kabhi hum ne kiya ishq pasheman hue
zindagi hai to abhi aur pasheman honge

koi bhi gham ho gham-e-dil ki gham-e-dahr 'hafiz'
hum ba-har-haal ba-har-rang ghazal-KHwan honge

Videos
This video is playing from YouTube Videos
This video is playing from YouTube Hafeez Hoshiarpuri

Source: Book : Nuquush Lahore (Pg. 203) Author : Mohd Tufail Publication : Idara Farog-e-urdu, Lahore (Feb.1956 ) Edition : Feb.1956