ek hī baar nahīñ hai vo dobāra kam hai
maiñ vo dariyā huuñ jise apnā kināra kam hai

vahī takrār hai aur ek vahī yaksānī
is shab-o-roz meñ ab apnā guzāra kam hai

mere din raat meñ karnā nahīñ ab is ko shumār
hissa-e-umr koī maiñ ne guzārā kam hai

maiñ ziyāda huuñ bahut us ke liye ab tak bhī
aur mere liye vo saare kā saarā kam hai

us kī apnī bhī tavajjoh nahīñ mujh par koī ḳhaas
aur maiñ ne bhī abhī us ko pukārā kam hai

aaj paanī jo uchhaltā nahīñ pahle kī tarah
aisā lagtā hai ki is meñ koī dhārā kam hai

haath pair aap hī maiñ maar rahā huuñ filhāl
Dūbte ko abhī tinke kā sahārā kam hai

maiñ to rakhtā huuñ bahut roz ke roz in kā hisāb
āsmāñ par koī aaj ek sitāra kam hai

pesh-raft aur abhī mumkin bhī nahīñ hai ki 'zafar'
abhī us shoḳh pe kuchh zor hamārā kam hai

ek hi bar nahin hai wo dobara kam hai
main wo dariya hun jise apna kinara kam hai

wahi takrar hai aur ek wahi yaksani
is shab-o-roz mein ab apna guzara kam hai

mere din raat mein karna nahin ab is ko shumar
hissa-e-umr koi main ne guzara kam hai

main ziyaada hun bahut us ke liye ab tak bhi
aur mere liye wo sare ka sara kam hai

us ki apni bhi tawajjoh nahin mujh par koi KHas
aur main ne bhi abhi us ko pukara kam hai

aaj pani jo uchhalta nahin pahle ki tarah
aisa lagta hai ki is mein koi dhaara kam hai

hath pair aap hi main mar raha hun filhaal
Dubte ko abhi tinke ka sahaara kam hai

main to rakhta hun bahut roz ke roz in ka hisab
aasman par koi aaj ek sitara kam hai

pesh-raft aur abhi mumkin bhi nahin hai ki 'zafar'
abhi us shoKH pe kuchh zor hamara kam hai