kahīñ thī raakh kahīñ thā dhuāñ kahīñ thī aag
falak Dhakā thā sitāroñ se jab zamīñ thī aag

jame hue lab-o-ruḳhsār bhī dahak rahe the
hisār-e-mausam-e-barfāb meñ hasīñ thī aag

hudūd-e-jism se bāhar nikal ke sard lagī
quyūd-e-jism meñ thī jab tak thī bar-tarīñ thī aag

adāvatoñ meñ na.e rañg bhar rahā thā vo
baġhal meñ saañp the aur zer-e-āstīñ thī aag

tirā TheThurtā badan bhī bujhā sakā na mujhe
kuchh aise bar-sar-e-sahn-e-badan makīñ thī aag

shab-e-visāl kā ahvāl pūchhnā mat dost
pas-e-qabā-e-ġhazab itr-ambarīñ thī aag

kamāl-e-kun ne rakhā pyaas meñ jamāl-e-āb
nahīñ thā jab kahīñ paanī kahīñ nahīñ thī aag

safar kā bojh barābar rahā hai donoñ par
jahāñ jahāñ bhī thā paanī vahīñ vahīñ thī aag

vajūd-e-lams kī lazzat se nā-shanās rahā
vo haath sard thā 'haidar' mirī jabīñ thī aag

kahin thi rakh kahin tha dhuan kahin thi aag
falak Dhaka tha sitaron se jab zamin thi aag

jame hue lab-o-ruKHsar bhi dahak rahe the
hisar-e-mausam-e-barfab mein hasin thi aag

hudud-e-jism se bahar nikal ke sard lagi
quyud-e-jism mein thi jab tak thi bar-tarin thi aag

adawaton mein nae rang bhar raha tha wo
baghal mein sanp the aur zer-e-astin thi aag

tera TheThurta badan bhi bujha saka na mujhe
kuchh aise bar-sar-e-sahn-e-badan makin thi aag

shab-e-visal ka ahwal puchhna mat dost
pas-e-qaba-e-ghazab itr-ambarin thi aag

kamal-e-kun ne rakha pyas mein jamal-e-ab
nahin tha jab kahin pani kahin nahin thi aag

safar ka bojh barabar raha hai donon par
jahan jahan bhi tha pani wahin wahin thi aag

wajud-e-lams ki lazzat se na-shanas raha
wo hath sard tha 'haidar' meri jabin thi aag