Subscribe to our newsletter and get our newest updates

Jaan Nisar Akhtar

  • Ghazal


tum pe kya bit gai kuchh to batao yaro


tum pe kyā biit ga.ī kuchh to batāo yaaro
maiñ koī ġhair nahīñ huuñ ki chhupāo yaaro

in añdheroñ se nikalne kī koī raah karo
ḳhūn-e-dil se koī mish.al hī jalāo yaaro

ek bhī ḳhvāb na ho jin meñ vo āñkheñ kyā haiñ
ik na ik ḳhvāb to āñkhoñ meñ basāo yaaro

bojh duniyā kā uThā.ūñgā akelā kab tak
ho sake tum se to kuchh haath baTāo yaaro

zindagī yuuñ to na bāñhoñ meñ chalī aa.egī
ġham-e-daurāñ ke zarā naaz uThāo yaaro

umr-bhar qatl huā huuñ maiñ tumhārī ḳhātir
āḳhirī vaqt to suulī na chaḌhāo yaaro

aur kuchh der tumheñ dekh ke jī luuñ Thahro
merī bālīñ se abhī uTh ke na jaao yaaro

tum pe kya bit gai kuchh to batao yaro
main koi ghair nahin hun ki chhupao yaro

in andheron se nikalne ki koi rah karo
KHun-e-dil se koi mishal hi jalao yaro

ek bhi KHwab na ho jin mein wo aankhen kya hain
ek na ek KHwab to aankhon mein basao yaro

bojh duniya ka uThaunga akela kab tak
ho sake tum se to kuchh hath baTao yaro

zindagi yun to na banhon mein chali aaegi
gham-e-dauran ke zara naz uThao yaro

umr-bhar qatl hua hun main tumhaari KHatir
aaKHiri waqt to suli na chaDhao yaro

aur kuchh der tumhein dekh ke ji lun Thahro
meri baalin se abhi uTh ke na jao yaro


Leave a comment

+