vo chāñd-rut ke hasīn lamhoñ kī shā.irī hai
ki us kī bāteñ hazār sāloñ kī shā.irī hai

ye ḳhushk patte ki jaise rāhoñ meñ lafz bikhre
udaas mausam meñ in daraḳhtoñ kī shā.irī hai

hamārī āñkheñ udaas ġhazloñ ke qāfiye haiñ
hamārā chehra purāne vaqtoñ kī shā.irī hai

tumhārā hañsnā hamārī nazmoñ kī ibtidā thī
hamārā ronā tumhārī āñkhoñ kī shā.irī hai

ye sirf harfoñ kī tāb-kārī kā zahr kab hai
ḳhudā ke bando ye ham ġharīboñ kī shā.irī hai

wo chand-rut ke hasin lamhon ki shairi hai
ki us ki baaten hazar salon ki shairi hai

ye KHushk patte ki jaise rahon mein lafz bikhre
udas mausam mein in daraKHton ki shairi hai

hamari aankhen udas ghazlon ke qafiye hain
hamara chehra purane waqton ki shairi hai

tumhaara hansna hamari nazmon ki ibtida thi
hamara rona tumhaari aankhon ki shairi hai

ye sirf harfon ki tab-kari ka zahr kab hai
KHuda ke bando ye hum gharibon ki shairi hai