sūraj ke saath saath ubhāre ga.e haiñ ham
tārīkiyoñ meñ phir bhī utāre ga.e haiñ ham

raas aa sakī na ham ko havā tere shahr kī
yuuñ to qadam qadam pe sañvāre ga.e haiñ ham

kuchh qahqahoñ ke abr-e-ravāñ ne diyā nikhār
kuchh ġham kī dhuup se bhī nikhāre ga.e haiñ ham

sāhil se rābta haiñ nahīñ TūTtā kabhī
kaise samundaroñ meñ utāre ga.e haiñ ham

TuuTā na rāh-e-shauq meñ afsūn-e-tīrgī
le kar jilau meñ chāñd sitāre ga.e haiñ ham

jaanā muhāl thā tirī mahfil ko chhoḌ kar
pā kar tirī nazar ke ishāre ga.e haiñ ham

is tiira ḳhāk-dāñ meñ koī pūchhtā nahīñ
kahne ko āsmāñ se utāre ga.e haiñ ham

sau baar bār-e-ġham ne pareshāñ kiyā hameñ
sau baar misl-e-zulf sañvāre ga.e haiñ ham

is silsile meñ maut to badnām hai yūñhī
is zindagī ke hāthoñ hī maare ga.e haiñ ham

gardāb-e-ġham meñ Duub ke ubhre haiñ bārhā
kis ne kahā kināre kināre ga.e haiñ ham

'yazdānī'-e-hazīñ hameñ kuchh bhī ḳhabar nahīñ
us āstāñ pe kis ke sahāre ga.e haiñ ham

suraj ke sath sath ubhaare gae hain hum
tarikiyon mein phir bhi utare gae hain hum

ras aa saki na hum ko hawa tere shahr ki
yun to qadam qadam pe sanware gae hain hum

kuchh qahqahon ke abr-e-rawan ne diya nikhaar
kuchh gham ki dhup se bhi nikhaare gae hain hum

sahil se rabta hain nahin TuTta kabhi
kaise samundaron mein utare gae hain hum

TuTa na rah-e-shauq mein afsun-e-tirgi
le kar jilau mein chand sitare gae hain hum

jaana muhaal tha teri mahfil ko chhoD kar
pa kar teri nazar ke ishaare gae hain hum

is tera KHak-dan mein koi puchhta nahin
kahne ko aasman se utare gae hain hum

sau bar bar-e-gham ne pareshan kiya hamein
sau bar misl-e-zulf sanware gae hain hum

is silsile mein maut to badnam hai yunhi
is zindagi ke hathon hi mare gae hain hum

gardab-e-gham mein Dub ke ubhre hain barha
kis ne kaha kinare kinare gae hain hum

'yazdani'-e-hazin hamein kuchh bhi KHabar nahin
us aastan pe kis ke sahaare gae hain hum