ho chukā va.az kā asar vaa.iz
ab to rindoñ se dar-guzar vaa.iz

sub.h-dam ham se tū na kar takrār
hai hameñ pahle dard-e-sar vaa.iz

bazm-e-rindāñ meñ ho agar shāmil
phir tujhe kuchh nahīñ ḳhatar vaa.iz

va.az apnā ye bhuul jaa.e tū
aave gar yār-e-sīm-bar vaa.iz

hai ye murġh-e-sahar se bhī faa.iq
sub.h uThtā hai peshtar vaa.iz

masjid-o-ka.aba meñ tū phirtā hai
kū-e-jānāñ se be-ḳhabar vaa.iz

shor-o-ġhul band to nahīñ kartā
hai tū insāñ ki koī ḳhar vaa.iz

zāhirī va.az se hai kyā hāsil
apne bātin ko saaf kar vaa.iz

banda-e-kū-e-yār hai 'bahrām'
terī masjid se kyā ḳhabar vaa.iz

ho chuka waz ka asar waiz
ab to rindon se dar-guzar waiz

subh-dam hum se tu na kar takrar
hai hamein pahle dard-e-sar waiz

bazm-e-rindan mein ho agar shamil
phir tujhe kuchh nahin KHatar waiz

waz apna ye bhul jae tu
aawe gar yar-e-sim-bar waiz

hai ye murgh-e-sahar se bhi faiq
subh uThta hai peshtar waiz

masjid-o-kaba mein tu phirta hai
ku-e-jaanan se be-KHabar waiz

shor-o-ghul band to nahin karta
hai tu insan ki koi KHar waiz

zahiri waz se hai kya hasil
apne baatin ko saf kar waiz

banda-e-ku-e-yar hai 'bahram'
teri masjid se kya KHabar waiz

Source: Deewan-e-Bahram