kabhī jo shab kī siyāhī se nā-gahāñ guzre
ham ahl-e-zarf har ik soch par garāñ guzre

nigāh-o-dil se miTā deñ jo tishnagī kā azaab
vo ābshār ke dhāre abhī kahāñ guzre

ġham āfrīñ thā musalsal sukūt-e-shahar-e-habīb
ham is galī se magar phir bhī shādmāñ guzre

shikastagī kī tilismī fazā na.ī to nahīñ
yahāñ to aise ka.ī daur imtihāñ guzre

nazar meñ shoḳh shabīheñ liye hue hai sahar
abhī na koī idhar se dhuāñ dhuāñ guzre

tamām koh kashākash thā mere sar pe 'ḳhayāl'
agarche aur bhī duniyā meñ saḳht jaañ guzre

kabhi jo shab ki siyahi se na-gahan guzre
hum ahl-e-zarf har ek soch par garan guzre

nigah-o-dil se miTa den jo tishnagi ka azab
wo aabshaar ke dhaare abhi kahan guzre

gham aafrin tha musalsal sukut-e-shahar-e-habib
hum is gali se magar phir bhi shadman guzre

shikastagi ki tilismi faza nai to nahin
yahan to aise kai daur imtihan guzre

nazar mein shoKH shabihen liye hue hai sahar
abhi na koi idhar se dhuan dhuan guzre

tamam koh kashakash tha mere sar pe 'KHayal'
agarche aur bhi duniya mein saKHt jaan guzre