Subscribe to our newsletter and get our newest updates

Hafeez Jalandhari

  • Ghazal


be-talluq zindagi achchhi nahin


be-ta.alluq zindagī achchhī nahīñ
zindagī kyā maut bhī achchhī nahīñ

aaj bhī paayā hai un ko bad-mizāj
sūrat-e-hālāt abhī achchhī nahīñ

hasrat-e-dil dekh āñkhoñ meñ na baiTh
is qadar be-pardagī achchhī nahīñ

maiñ na kahtā thā dil-e-ḳhāna-ḳharāb
dilbaroñ se dil-lagī achchhī nahīñ

sair kiije husn ke bāzār kī
haañ magar āvārgī achchhī nahīñ

dil lagāo to lagāo dil se dil
dil-lagī hī dil-lagī achchhī nahīñ

ye havā ye abr ye sabza 'hafīz'
aaj piine meñ kamī achchhī nahīñ

be-talluq zindagi achchhi nahin
zindagi kya maut bhi achchhi nahin

aaj bhi paya hai un ko bad-mizaj
surat-e-haalat abhi achchhi nahin

hasrat-e-dil dekh aankhon mein na baiTh
is qadar be-pardagi achchhi nahin

main na kahta tha dil-e-KHana-KHarab
dilbaron se dil-lagi achchhi nahin

sair kije husn ke bazar ki
han magar aawargi achchhi nahin

dil lagao to lagao dil se dil
dil-lagi hi dil-lagi achchhi nahin

ye hawa ye abr ye sabza 'hafiz'
aaj pine mein kami achchhi nahin


Source: Book : Kulliyat-e-Hafeez Jalandhari (Pg. 196)

Leave a comment

+