Subscribe to our newsletter and get our newest updates

Nafas Ambalvi

  • Ghazal


milte hain muskura ke agarche tamam log


milte haiñ muskurā ke agarche tamām log
mar mar ke jī rahe haiñ magar sub.h-o-shām log

ye bhuuk ye havas ye tanazzul ye vahshateñ
ta.amīr kar rahe haiñ ye kaisā nizām log

barbādiyoñ ne mujh ko bahut surḳh-rū kiyā
karne lage haiñ ab to mirā ehtirām log

inkār kar rahā huuñ to qīmat buland hai
bikne pe aa gayā to girā deñge daam log

is ahd meñ anā kī hifāzat ke vāste
phirte haiñ le ke haath meñ ḳhālī niyām log

baiThe haiñ ḳhud hī paañv meñ zanjīr Daal kar
hairāñ huuñ buzdilī ke haiñ kitne ġhulām log

kis kis kā e'tibār kareñ shahr meñ 'nafas'
chehre badal badal ke mile haiñ tamām log

milte hain muskura ke agarche tamam log
mar mar ke ji rahe hain magar subh-o-sham log

ye bhuk ye hawas ye tanazzul ye wahshaten
tamir kar rahe hain ye kaisa nizam log

barbaadiyon ne mujh ko bahut surKH-ru kiya
karne lage hain ab to mera ehtiram log

inkar kar raha hun to qimat buland hai
bikne pe aa gaya to gira denge dam log

is ahd mein ana ki hifazat ke waste
phirte hain le ke hath mein KHali niyam log

baiThe hain KHud hi panw mein zanjir Dal kar
hairan hun buzdili ke hain kitne ghulam log

kis kis ka e'tibar karen shahr mein 'nafas'
chehre badal badal ke mile hain tamam log


Leave a comment

+