Subscribe to our newsletter and get our newest updates

Jameel Mazhari

  • Ghazal


kaun kahta hai baDha shauq idhar se pahle


kaun kahtā hai baḌhā shauq idhar se pahle
kis ne dekhā thā kise tirchhī nazar se pahle

mutma.in ho le zarā ahl-e-nazar se pahle
parde āñkhoñ ke uThā parda-e-dar se pahle

abhī tālīm-e-vafā yaanī jafā kā nahīñ vaqt
tarbiyat shauq kī ho lutf-e-nazar se pahle

haañ mohabbat meñ maza hai mujhe inkār nahīñ
magar ai zauq-e-ḳhalish dard-e-jigar se pahle

sālik-e-rāh-e-vafā hai dil-e-āshufta-mizāj
muzhda-e-gumrahi-e-shauq-e-safar se pahle

jur.at-e-arz-e-tamannā pe ḳhafā ho lenā
muskurāo to zarā nīchī nazar se pahle

mausam-e-kaif meñ be-kaifi-e-jazbāt na pūchh
dil-e-bulbul hai fasurda gul-e-tar se pahle

jumbish-e-muztarib-e-parda-e-ismat kī qasam
jalve betāb hue zauq-e-nazar se pahle

jin se badnām hue ishq ke jazbāt-e-latīf
vo ishāre the idhar se ki udhar se pahle

do irādoñ meñ jo haa.il the hayā ke parde
kis ne sarkā.e ishārāt-e-nazar se pahle

kyuuñ koī pahlu-e-jānāñ meñ jagah paa.e 'jamīl'
aaj ham bazm meñ pahuñcheñge qamar se pahle

kaun kahta hai baDha shauq idhar se pahle
kis ne dekha tha kise tirchhi nazar se pahle

mutmain ho le zara ahl-e-nazar se pahle
parde aankhon ke uTha parda-e-dar se pahle

abhi talim-e-wafa yani jafa ka nahin waqt
tarbiyat shauq ki ho lutf-e-nazar se pahle

han mohabbat mein maza hai mujhe inkar nahin
magar ai zauq-e-KHalish dard-e-jigar se pahle

salik-e-rah-e-wafa hai dil-e-ashufta-mizaj
muzhda-e-gumrahi-e-shauq-e-safar se pahle

jurat-e-arz-e-tamanna pe KHafa ho lena
muskurao to zara nichi nazar se pahle

mausam-e-kaif mein be-kaifi-e-jazbaat na puchh
dil-e-bulbul hai fasurda gul-e-tar se pahle

jumbish-e-muztarib-e-parda-e-ismat ki qasam
jalwe betab hue zauq-e-nazar se pahle

jin se badnam hue ishq ke jazbaat-e-latif
wo ishaare the idhar se ki udhar se pahle

do iradon mein jo hail the haya ke parde
kis ne sarkae ishaaraat-e-nazar se pahle

kyun koi pahlu-e-jaanan mein jagah pae 'jamil'
aaj hum bazm mein pahunchenge qamar se pahle


Leave a comment

+