Subscribe to our newsletter and get our newest updates

Jaleel Saz

  • Ghazal


sahil pe gawara hamein marna bhi nahin hai


sāhil pe gavāra hameñ marnā bhī nahīñ hai
TuuTī huī kashtī se utarnā bhī nahīñ hai

baiThe haiñ shab-o-roz tasavvur meñ usī ke
vo rāhguzar jis se guzarnā bhī nahīñ hai

likkheñge ba-har-hāl hikāyāt-e-junūñ ham
sachchā.ī qalam meñ hai to Darnā bhī nahīñ hai

ahbāb bhī ab tez kiye baiThe haiñ nāḳhun
ab apne kisī zaḳhm ko bharnā bhī nahīñ hai

qātil ko bulā laao sitamgar ko sadā do
inkār mujhe maut se karnā bhī nahīñ hai

ye ḳhaak hai aadam kī dabā is ko lahad meñ
is ḳhaak ko rāhoñ meñ bikharnā bhī nahīñ hai

ehsān masāfat meñ kisī kā nahīñ lete
dīvār ke saa.e meñ Thaharnā bhī nahīñ hai

sahil pe gawara hamein marna bhi nahin hai
TuTi hui kashti se utarna bhi nahin hai

baiThe hain shab-o-roz tasawwur mein usi ke
wo rahguzar jis se guzarna bhi nahin hai

likkhenge ba-har-haal hikayat-e-junun hum
sachchai qalam mein hai to Darna bhi nahin hai

ahbab bhi ab tez kiye baiThe hain naKHun
ab apne kisi zaKHm ko bharna bhi nahin hai

qatil ko bula lao sitamgar ko sada do
inkar mujhe maut se karna bhi nahin hai

ye KHak hai aadam ki daba is ko lahad mein
is KHak ko rahon mein bikharna bhi nahin hai

ehsan masafat mein kisi ka nahin lete
diwar ke sae mein Thaharna bhi nahin hai


Source: Rooh-e-Ghazal,Pachas Sala Intekhab

Leave a comment

+