Subscribe to our newsletter and get our newest updates

Karam Haidari

  • Ghazal


ba-qadr-e-shauq nahin lutf-e-mahfil-arai


ba-qadr-e-shauq nahīñ lutf-e-mahfil-ārā.ī
shadīd-tar hai sar-e-bazm apnī tanhā.ī

kahāñ vo sho.ala-navā.ī kahāñ ye ḳhāmoshī
badal ga.e haiñ zamāne ki tere saudā.ī

mirī fuġhāñ ko to samjheñge log merā junūñ
tirā sukūt na ban jaa.e vaj.h-e-rusvā.ī

sadaf sadaf hai shikār-e-talātum-e-dariyā
kisī guhar meñ to paidā ho shān-e-yaktā.ī

na fikr-o-hosh na qalb-o-nazar na zarf-o-zamīr
nayā jahāñ hai na.ī ḳhusravī-o-dārā.ī

charāġh-e-rāh-e-mohabbat thī ḳhāk-e-ahl-e-vafā
qadam qadam pe 'karam' raushnī nazar aa.ī

ba-qadr-e-shauq nahin lutf-e-mahfil-arai
shadid-tar hai sar-e-bazm apni tanhai

kahan wo shoala-nawai kahan ye KHamoshi
badal gae hain zamane ki tere saudai

meri fughan ko to samjhenge log mera junun
tera sukut na ban jae wajh-e-ruswai

sadaf sadaf hai shikar-e-talatum-e-dariya
kisi guhar mein to paida ho shan-e-yaktai

na fikr-o-hosh na qalb-o-nazar na zarf-o-zamir
naya jahan hai nai KHusrawi-o-darai

charagh-e-rah-e-mohabbat thi KHak-e-ahl-e-wafa
qadam qadam pe 'karam' raushni nazar aai


Source: Funoon(Jadeed Ghazal Number: Volume-002)

Leave a comment

+