Subscribe to our newsletter and get our newest updates

Zaheer Ghazipuri

  • Ghazal


har aadmi ko KHwab dikhana muhaal hai


har aadmī ko ḳhvāb dikhānā muhāl hai
sho.aloñ meñ jaise phuul khilānā muhāl hai

kāġhaz kī naav bhī hai khilaune bhī haiñ bahut
bachpan se phir bhī haath milānā muhāl hai

insāñ kī shakl hī meñ darinde bhī haiñ magar
har aks ā.īne meñ dikhānā muhāl hai

mushkil nahīñ utārnā sūraj ko thaal meñ
lekin charāġh us se jalānā muhāl hai

ik baar ḳhud jo lafzoñ ke pinjre meñ aa gayā
us tā.ir-e-navā ko uḌānā muhāl hai

apne lahū kī bheñT chaḌhāne ke ba.ad bhī
qadroñ kī har fasīl tak aanā muhāl hai

tā-umr apnī fikr o riyāzat ke bāvajūd
ḳhud ko kisī sazā se bachānā muhāl hai

har aadmi ko KHwab dikhana muhaal hai
shoalon mein jaise phul khilana muhaal hai

kaghaz ki naw bhi hai khilaune bhi hain bahut
bachpan se phir bhi hath milana muhaal hai

insan ki shakl hi mein darinde bhi hain magar
har aks aaine mein dikhana muhaal hai

mushkil nahin utarna suraj ko thaal mein
lekin charagh us se jalana muhaal hai

ek bar KHud jo lafzon ke pinjre mein aa gaya
us tair-e-nawa ko uDana muhaal hai

apne lahu ki bhenT chaDhane ke baad bhi
qadron ki har fasil tak aana muhaal hai

ta-umr apni fikr o riyazat ke bawajud
KHud ko kisi saza se bachana muhaal hai


Source: Book : Karwaan-e-Ghazal (Pg. 271) Author : Farooq Argali Publication : Farid Book Depot (Pvt.) Ltd (2004) Edition : 2004

Leave a comment

+