hameñ taqsīm karne kā hunar un par nirālā hai
magar un ko harāne kā irāda ham ne paalā hai

zamāne bhar ke ranj-o-ġham kabhī mujh ko diye us ne
kabhī jab laḌkhaḌāyā to mujhe baḌh kar sambhālā hai

makhoTe vo sadā jhūTe lagā kar ham se hai miltā
bahut shātir paḌosī hai janam se dekhā-bhālā hai

kiyā jo bazm meñ zikr-e-vafā un kī to vo bole
nahīñ jo mudda.ā us baat ko phir kyuuñ uchhālā hai

kisī se qarz le kar shahar ko phir jā.egā 'hariyā'
adālat ne jo is kā faisla hī kal pe Taalā hai

bike haiñ log dene ko gavāhī jhuuT ke haq meñ
magar sach jānte haiñ jo unhīñ ke muñh pe taalā hai

burā.ī ḳhatm karne ko buroñ kā haath bhī thāmā
'asar' kāñTe se ham ne paaoñ kā kāñTā nikālā hai

hamein taqsim karne ka hunar un par nirala hai
magar un ko harane ka irada hum ne pala hai

zamane bhar ke ranj-o-gham kabhi mujh ko diye us ne
kabhi jab laDkhaDaya to mujhe baDh kar sambhaala hai

makhoTe wo sada jhuTe laga kar hum se hai milta
bahut shatir paDosi hai janam se dekha-bhaala hai

kiya jo bazm mein zikr-e-wafa un ki to wo bole
nahin jo muddaa us baat ko phir kyun uchhaala hai

kisi se qarz le kar shahar ko phir jaega 'hariya'
adalat ne jo is ka faisla hi kal pe Tala hai

bike hain log dene ko gawahi jhuT ke haq mein
magar sach jaante hain jo unhin ke munh pe tala hai

burai KHatm karne ko buron ka hath bhi thama
'asar' kanTe se hum ne paon ka kanTa nikala hai

Videos
This video is playing from YouTube Videos
This video is playing from YouTube Pramod Sharma Asar RECITATIONS Pramod Sharma Asar



00:00/00:00 hamein taqsim karne ka hunar un par nirala hai Pramod Sharma Asar

Source: Book : Rang Sapno ke (Pg. 109) Author : Pramod Sharma 'Asar' Publication : Amrit Parkashan (2016) Edition : 2016