ḳhazāne bhī mileñ is ke evaz to ham na becheñge
hamārā ġham hai mazlūmoñ kā ġham ye ġham na becheñge

kuhistānoñ se patthar kaaT kar lā.eñge ham lekin
kisī zālim ke hāthoñ zaḳhm kā marham na becheñge

balā se dhuul phāñkeñ yā purāne chīthḌe pahneñ
magar yaaro matā-e-ilm-o-dānish ham na becheñge

kisī darbār meñ jā kar adab aur fan kī sūrat meñ
tumhārī ambarīñ zulfoñ ke pech-o-ḳham na becheñge

hamārā inqalāb aa.egā jab to kaam aa.egā
abhī apnī tamannā kā ujālā ham na becheñge

gulistāñ bech kar khānā havas-kāroñ kā sheva hai
chaman vaalo papīhoñ kā tarannum ham na becheñge

bharī mahfil meñ 'daurāñ' aaj ham phir ahd karte haiñ
jo hai insāniyat kī aas vo parcham na becheñge

KHazane bhi milen is ke ewaz to hum na bechenge
hamara gham hai mazlumon ka gham ye gham na bechenge

kuhistanon se patthar kaT kar laenge hum lekin
kisi zalim ke hathon zaKHm ka marham na bechenge

bala se dhul phanken ya purane chithDe pahnen
magar yaro mata-e-ilm-o-danish hum na bechenge

kisi darbar mein ja kar adab aur fan ki surat mein
tumhaari ambarin zulfon ke pech-o-KHam na bechenge

hamara inqalab aaega jab to kaam aaega
abhi apni tamanna ka ujala hum na bechenge

gulistan bech kar khana hawas-karon ka shewa hai
chaman walo papihon ka tarannum hum na bechenge

bhari mahfil mein 'dauran' aaj hum phir ahd karte hain
jo hai insaniyat ki aas wo parcham na bechenge

Source: Book : Ababeel (Pg. 72) Author : Owais Ahmad Dauran Publication : label litho press Ramna Road Patna-4 (1986) Edition : 1986