tum aa ga.e ho jab se khaTakne lagī hai shaam
sāġhar kī tarah roz chhalakne lagī hai shaam

shāyad kisī kī yaad kā mausam phir aa gayā
pahlū meñ dil kī tarah dhaḌakne lagī hai shaam

kuchh tū hī apne ḳhūn-e-ramīda kī le ḳhabar
palkoñ pe qatra qatra Tapakne lagī hai shaam

sahrā-e-pur-sukūt meñ kuchh āhuoñ ke saath
phir kis kī aarzū meñ bhaTakne lagī hai shaam

kyā jaane aaj kyuuñ kisī mazdūr kī tarah
sūraj ġhurūb hote hī thakne lagī hai shaam

kuchh aur aa.ina meñ sañvarne lage haiñ vo
jis din se un pe jaan chhiḌakne lagī hai shaam

'daurāñ' sunā hai sūrat-e-gesū-e-ambarīñ
imsāl phir chaman meñ mahakne lagī hai shaam

tum aa gae ho jab se khaTakne lagi hai sham
saghar ki tarah roz chhalakne lagi hai sham

shayad kisi ki yaad ka mausam phir aa gaya
pahlu mein dil ki tarah dhaDakne lagi hai sham

kuchh tu hi apne KHun-e-ramida ki le KHabar
palkon pe qatra qatra Tapakne lagi hai sham

sahra-e-pur-sukut mein kuchh aahuon ke sath
phir kis ki aarzu mein bhaTakne lagi hai sham

kya jaane aaj kyun kisi mazdur ki tarah
suraj ghurub hote hi thakne lagi hai sham

kuchh aur aaina mein sanwarne lage hain wo
jis din se un pe jaan chhiDakne lagi hai sham

'dauran' suna hai surat-e-gesu-e-ambarin
imsal phir chaman mein mahakne lagi hai sham

Source: Book : Ababeel (Pg. 144) Author : Owais Ahmad Dauran Publication : label litho press Ramna Road Patna-4 (1986) Edition : 1986