ab dard be-dayār hai aur jag-hañsā.ī hai
is ishq ne bhī kaisī javāñ maut paa.ī hai

bādal haiñ dal ke dal koī rauzan kahīñ nahīñ
ab chhāvnī ġhamoñ ne falak par bhī chhā.ī hai

ruḳhsat ke ba.ad tere sarāpe se māvarā
ye kaun sī adā hai jo ab yaad aa.ī hai

aa.ī jo sar pe dhuup lage ḳhema-e-ḳhayāl
tum ho jabhī to vaqt ko yuuñ niiñd aa.ī hai

chup ho gayā hai dil sā fasāna-nigār bhī
tanhā.ī ik rahī thī so vo bhī parā.ī hai

kyā ab kabhī junūñ kā bulāvā na aa.egā
sahrā kī ḳhaak uḌ ke ḳhayābāñ meñ aa.ī hai

jo guzre ġham ko ḳhud meñ samo.e raheñge ham
ham ne 'zahīr' jiine kī saugand khaa.ī hai

ab dard be-dayar hai aur jag-hansai hai
is ishq ne bhi kaisi jawan maut pai hai

baadal hain dal ke dal koi rauzan kahin nahin
ab chhawni ghamon ne falak par bhi chhai hai

ruKHsat ke baad tere sarape se mawara
ye kaun si ada hai jo ab yaad aai hai

aai jo sar pe dhup lage KHema-e-KHayal
tum ho jabhi to waqt ko yun nind aai hai

chup ho gaya hai dil sa fasana-nigar bhi
tanhai ek rahi thi so wo bhi parai hai

kya ab kabhi junun ka bulawa na aaega
sahra ki KHak uD ke KHayaban mein aai hai

jo guzre gham ko KHud mein samoe rahenge hum
hum ne 'zahir' jine ki saugand khai hai

Source: Funoon(Jadeed Ghazal Number: Volume-002)